wo bewafa bhi ho to kya ye aisi bhi KHata nahin

vo bevafā bhī ho to kyā ye aisī bhī ḳhatā nahīñ

ye zindagī bhī chaar din meñ degī kyā daġhā nahīñ

zabān par savāl the pa lab mire sile rahe

vo muntazir khaḌā rahā pa maiñ ne kuchh kahā nahīñ

vo raah apnī chal paḌā na muḌ ke dekhā us ne phir

maiñ but banī khaḌī rahī aur vo kabhī rukā nahīñ

do lafz bhī kahe binā vo uTh ke kyoñ chalā gayā

talāshtī rahī use pa vo kahīñ milā nahīñ

be-kār hī maiñ sochtī thī dil kā saath hai sadā

jo dil kisī pe aa gayā to us kā aasrā nahīñ

havā bahut chalī magar charāġh kī bhī zid rahī

jo raakh ko sharar kiyā to dil kabhī bujhā nahīñ

maiñ sabr us kā luuT luuñ qarār us kā chhīn luuñ

ye merī sādgī hī hai ki maiñ ne yuuñ kiyā nahīñ

thī Dor ik juḌī huī yuuñ mere us ke darmiyāñ

ki rāste judā the phir bhī pyaar kam huā nahīñ

nigāh meñ ik aas thī laboñ pe mere aah thī

ki yaad to kiyā use magar kabhī kahā nahīñ

wo bewafa bhi ho to kya ye aisi bhi KHata nahin

ye zindagi bhi chaar din mein degi kya dagha nahin

zaban par sawal the pa lab mere sile rahe

wo muntazir khaDa raha pa main ne kuchh kaha nahin

wo rah apni chal paDa na muD ke dekha us ne phir

main but bani khaDi rahi aur wo kabhi ruka nahin

do lafz bhi kahe bina wo uTh ke kyon chala gaya

talashti rahi use pa wo kahin mila nahin

be-kar hi main sochti thi dil ka sath hai sada

jo dil kisi pe aa gaya to us ka aasra nahin

hawa bahut chali magar charagh ki bhi zid rahi

jo rakh ko sharar kiya to dil kabhi bujha nahin

main sabr us ka luT lun qarar us ka chhin lun

ye meri sadgi hi hai ki main ne yun kiya nahin

thi Dor ek juDi hui yun mere us ke darmiyan

ki raste juda the phir bhi pyar kam hua nahin

nigah mein ek aas thi labon pe mere aah thi

ki yaad to kiya use magar kabhi kaha nahin