wo bewafa hai hamein ye malal thoDi hai

vo bevafā hai hameñ ye malāl thoḌī hai

hameñ bhī raat din us kā ḳhayāl thoḌī hai

abhī hai qaid meñ be-shak jahāñ kī rasmoñ ke

abhī sazāoñ se naarī bahāl thoḌī hai

ġhulām apnā banā leñ jo ḳhvāhishāt ko ham

basar ġharībī meñ karnā muhāl thoḌī hai

hamārī aañkh meñ sharm-o-hayā kā hai parda

nazar milā.e koī ye majāl thoḌī hai

vafā karoge to ham se vafā hī pāoge

tumhāre saath anā kā savāl thoḌī hai

zarā yaqīn kā chashma lagā ke dekho to

abhī vafāoñ kā itnā akaal thoḌī hai

ye kaisī chāroñ taraf chāñdnī bikhartī hai

koī hasīn hai chhat par hilāl thoḌī hai

ye baat aaj mujhe aa.ine ne samjhā.ī

tumhāre husn pe itnā zavāl thoḌī hai

zarūr tum ho kisī ke chaḌhā.e meñ varna

tumhāre ḳhuun meñ itnā ubaal thoḌī hai

hamārā dil to hai shaffāf aa.ine kī tarah

is aa.ine meñ bhalā koī baal thoḌī hai

wo bewafa hai hamein ye malal thoDi hai

hamein bhi raat din us ka KHayal thoDi hai

abhi hai qaid mein be-shak jahan ki rasmon ke

abhi sazaon se nari bahaal thoDi hai

ghulam apna bana len jo KHwahishat ko hum

basar gharibi mein karna muhaal thoDi hai

hamari aankh mein sharm-o-haya ka hai parda

nazar milae koi ye majal thoDi hai

wafa karoge to hum se wafa hi paoge

tumhaare sath ana ka sawal thoDi hai

zara yaqin ka chashma laga ke dekho to

abhi wafaon ka itna akal thoDi hai

ye kaisi chaaron taraf chandni bikharti hai

koi hasin hai chhat par hilal thoDi hai

ye baat aaj mujhe aaine ne samjhai

tumhaare husn pe itna zawal thoDi hai

zarur tum ho kisi ke chaDhae mein warna

tumhaare KHun mein itna ubaal thoDi hai

hamara dil to hai shaffaf aaine ki tarah

is aaine mein bhala koi baal thoDi hai