wo bola KHush hai bahut mujhse dur jate hue

vo bolā ḳhush hai bahut mujh se duur jaate hue

jhijhak rahā thā magar kyoñ nazar milāte hue

diye kī lau kī tapish maiñ ne dil pe kī mahsūs

guzishta raat tire saare ḳhat jalāte hue

maiñ muskurāne lagā maut kī sazā sun kar

sisak ke rone lagā vo sazā sunāte hue

vo aane vaalā na aayā agar to kyā hogā

ye sochtā huuñ maiñ dīvār-o-dar sajāte hue

jhaTak ke toḌ diiñ pairoñ kī saarī zanjīreñ

palaT ke dekhā nahīñ ghar ko ghar se jaate hue

vo pal judā.ī kā kuchh itnā jān-levā thā

maiñ ḳhud bhī rone lagā us ko chup karāte hue

qafas meñ rahte the ham saath itnā mil-jul kar

bahut udaas huā maiñ rihā.ī paate hue

'kamāl' itnā use ḳhauf hai ta'āqub kā

qadam baḌhātā hai naqsh-e-qadam miTāte hue

wo bola KHush hai bahut mujh se dur jate hue

jhijhak raha tha magar kyon nazar milate hue

diye ki lau ki tapish main ne dil pe ki mahsus

guzishta raat tere sare KHat jalate hue

main muskurane laga maut ki saza sun kar

sisak ke rone laga wo saza sunate hue

wo aane wala na aaya agar to kya hoga

ye sochta hun main diwar-o-dar sajate hue

jhaTak ke toD din pairon ki sari zanjiren

palaT ke dekha nahin ghar ko ghar se jate hue

wo pal judai ka kuchh itna jaan-lewa tha

main KHud bhi rone laga us ko chup karaate hue

qafas mein rahte the hum sath itna mil-jul kar

bahut udas hua main rihai pate hue

'kamal' itna use KHauf hai ta'aqub ka

qadam baDhata hai naqsh-e-qadam miTate hue