wo bu-e-gul hai tu panw zamin par hi nahin

vo bū-e-gul hai tū paañv zamīn par hī nahīñ

maiñ sar jhukā.ūñ kahāñ koī sang-e-dar hī nahīñ

nazar bachā ke tire ġham se maiñ guzar jā.ūñ

mirī nigāh meñ aisī to rahguzar hī nahīñ

qafas-nasīboñ pe guzrī hai kyā ḳhudā jaane

sunā hai jism pe ab un ke bāl-o-par hī nahīñ

uThe bhī kyoñ nigah-e-bāġhbāñ mirī jānib

maiñ vo daraḳht huuñ jis meñ koī samar hī nahīñ

zarā ye shān-e-taġhāful to dekhiye un kī

maiñ un ke paas khaḌā huuñ unheñ ḳhabar hī nahīñ

junūñ kā qāfila manzil pe kis tarah pahuñche

tumhārī yaad kī ḳhushbū to ham-safar hī nahīñ

mirī hayāt musalsal jihād hai 'shādāñ'

havādisāt-e-zamāna kā mujh ko Dar hī nahīñ

wo bu-e-gul hai tu panw zamin par hi nahin

main sar jhukaun kahan koi sang-e-dar hi nahin

nazar bacha ke tere gham se main guzar jaun

meri nigah mein aisi to rahguzar hi nahin

qafas-nasibon pe guzri hai kya KHuda jaane

suna hai jism pe ab un ke baal-o-par hi nahin

uThe bhi kyon nigah-e-baghban meri jaanib

main wo daraKHt hun jis mein koi samar hi nahin

zara ye shan-e-taghaful to dekhiye un ki

main un ke pas khaDa hun unhen KHabar hi nahin

junun ka qafila manzil pe kis tarah pahunche

tumhaari yaad ki KHushbu to ham-safar hi nahin

meri hayat musalsal jihad hai 'shadan'

hawadisat-e-zamana ka mujh ko Dar hi nahin