wo chand-raat ka wada bhula diya tumne

vo chāñd-rāt kā vā'da bhulā diyā tum ne

hamāre saath ye achchhā nahīñ kiyā tum ne

purāne kāġhazoñ par kyā nahīñ likhā tum ne

mire ḳhayāl ko lekin nahīñ paḌhā tum ne

asīr-e-ḳhvāb sitāroñ ko kyā kahā tum ne

falak pe aaj mirā naam le liyā tum ne

nayā libās pahan kar kahāñ pe jā.ūñ maiñ

mire mizāj ko saada banā diyā tum ne

agarche bhuul chuke ho diloñ kā afsāna

kabhī na milne kā vā'da vafā kiyā tum ne

'ajīb dāstāñ hai jāvedānī ulfat kī

ki muskurāte hue kar diyā fanā tum ne

nazar milā.ī to mahsūs ye huā mujh ko

ki merī jaan ko hāthoñ meñ le liyā tum ne

agarche duur ho merī nigāh se ab bhī

har ek dard mire saath hī sahā tum ne

nazar mile to sabhī dard bol uThte haiñ

ye aur baat ki kuchh bhī nahīñ sunā tum ne

tumhāre aane kā imkān baḌh gayā shāyad

jalā diyā hai darīchoñ meñ phir diyā tum ne

paḌī nigāh tumhārī jo mere āñgan meñ

har ek chaak mire dard kā siyā tum ne

na apne vāste kaafī kabhī huī 'nīlam'

use ġharīb kī chādar banā diyā tum ne

wo chand-raat ka wa'da bhula diya tum ne

hamare sath ye achchha nahin kiya tum ne

purane kaghazon par kya nahin likha tum ne

mere KHayal ko lekin nahin paDha tum ne

asir-e-KHwab sitaron ko kya kaha tum ne

falak pe aaj mera nam le liya tum ne

naya libas pahan kar kahan pe jaun main

mere mizaj ko sada bana diya tum ne

agarche bhul chuke ho dilon ka afsana

kabhi na milne ka wa'da wafa kiya tum ne

'ajib dastan hai jawedani ulfat ki

ki muskuraate hue kar diya fana tum ne

nazar milai to mahsus ye hua mujh ko

ki meri jaan ko hathon mein le liya tum ne

agarche dur ho meri nigah se ab bhi

har ek dard mere sath hi saha tum ne

nazar mile to sabhi dard bol uThte hain

ye aur baat ki kuchh bhi nahin suna tum ne

tumhaare aane ka imkan baDh gaya shayad

jala diya hai darichon mein phir diya tum ne

paDi nigah tumhaari jo mere aangan mein

har ek chaak mere dard ka siya tum ne

na apne waste kafi kabhi hui 'nilam'

use gharib ki chadar bana diya tum ne