wo dar talak aawe na kabhi baat ki Thahre

vo dar talak aave na kabhī baat kī Thahre

hairāñ huuñ maiñ kis tarah mulāqāt kī Thahre

har roz kā milnā hai jo dushvār to pyāre

itnā to karo qasd ki ik raat kī Thahre

jis vaqt ki ham aa.eñ to ye chāhiye tum ko

auroñ se na phir harf-o-hikāyāt kī Thahre

ai dīda-e-tar tum bhī jhaḌī apnī lagā do

is saal to barsāt meñ barsāt kī Thahre

kis chiiz pe phir ham hoñ guftār-e-ta.ayyun

din raat kī Thahre hai na auqāt kī Thahre

jab kaaT ke dil pair ga.ī hove jigar meñ

phir kyuuñ na chhurī aap kī us baat kī Thahre

har roz ye chāhe hai tirī chashm kī gardish

is markaz-e-ḳhākī pe kuchh āfāt kī Thahre

ai 'mus.hafī' is vaqt vo mehmāñ hai tumhāre

hai ghaat kī jāgah tuu, agar ghaat kī Thahre

wo dar talak aawe na kabhi baat ki Thahre

hairan hun main kis tarah mulaqat ki Thahre

har roz ka milna hai jo dushwar to pyare

itna to karo qasd ki ek raat ki Thahre

jis waqt ki hum aaen to ye chahiye tum ko

auron se na phir harf-o-hikayat ki Thahre

ai dida-e-tar tum bhi jhaDi apni laga do

is sal to barsat mein barsat ki Thahre

kis chiz pe phir hum hon guftar-e-tayyun

din raat ki Thahre hai na auqat ki Thahre

jab kaT ke dil pair gai howe jigar mein

phir kyun na chhuri aap ki us baat ki Thahre

har roz ye chahe hai teri chashm ki gardish

is markaz-e-KHaki pe kuchh aafat ki Thahre

ai 'mushafi' is waqt wo mehman hai tumhaare

hai ghat ki jagah tu, agar ghat ki Thahre