wo daur-e-nashat-o-dida-o-dil jaise bas abhi guzra hi to hai

vo daur-e-nashāt-o-dīda-o-dil jaise bas abhī guzrā hī to hai

siine kī kasak kis tarah miTe har dāġh-e-kuhan taaza hī to hai

tū saath kahāñ lekin ab tak har rahguzar-e-tanhā.ī par

jo aage aage chaltā hai ai dost koī tujh sā hī to hai

is tā.ir-e-āvāra ke liye yuuñ jaal na bun ummīdoñ ke

uḌtā huā lamha jaise abhī roke se tire ruktā hī to hai

mālūm nahīñ kis vaqt ye kyā bartāv kisī se kartī hai

duniyā se koī ummīd na rakh māyūs na ho duniyā hī to hai

kirneñ na.e din ke sūraj kī phaileñgī to gum ho jā.egā

tārīk hai jis se dil kā ufuq guzrī shab kā saayā hī to hai

lamhoñ ke hujūm-e-gurezāñ meñ ik lamha jise apnā kahiye

jaañ de ke bhī haath aa jaa.e agar mahñgā kab hai sastā hī to hai

'maḳhmūr' ta.āqub kar dekho kuchh duur nahīñ haath aa jaa.e

ik gum-shuda ḳhushbū kā jhoñkā āñgan se abhī guzrā hī to hai

wo daur-e-nashat-o-dida-o-dil jaise bas abhi guzra hi to hai

sine ki kasak kis tarah miTe har dagh-e-kuhan taza hi to hai

tu sath kahan lekin ab tak har rahguzar-e-tanhai par

jo aage aage chalta hai ai dost koi tujh sa hi to hai

is tair-e-awara ke liye yun jal na bun ummidon ke

uDta hua lamha jaise abhi roke se tere rukta hi to hai

malum nahin kis waqt ye kya bartaw kisi se karti hai

duniya se koi ummid na rakh mayus na ho duniya hi to hai

kirnen nae din ke suraj ki phailengi to gum ho jaega

tarik hai jis se dil ka ufuq guzri shab ka saya hi to hai

lamhon ke hujum-e-gurezan mein ek lamha jise apna kahiye

jaan de ke bhi hath aa jae agar mahnga kab hai sasta hi to hai

'maKHmur' taaqub kar dekho kuchh dur nahin hath aa jae

ek gum-shuda KHushbu ka jhonka aangan se abhi guzra hi to hai