wo dil kab dil hai kahlane ke qabil

vo dil kab dil hai kahlāne ke qābil

jo ka.abe ke na but-ḳhāne ke qābil

ho jis kā dars apnāne ke qābil

vo afsāna hai dohrāne ke qābil

tumhārī zulf aur shāne ke qābil

ye hai zanjīr dīvāne ke qābil

hamīñ the ik faqat shāyad hamīñ the

tirī mahfil meñ kaam aane ke qābil

bane hai muddatoñ meñ dil bane hai

shahīd-e-nāz kahlāne ke qābil

mirī qismat kahāñ hai maiñ kahāñ huuñ

dayār-e-dost meñ jaane ke qābil

ye ahl-e-gulsitāñ gar chāheñ 'zamzam'

chaman hai to bahār aane ke qābil

wo dil kab dil hai kahlane ke qabil

jo kabe ke na but-KHane ke qabil

ho jis ka dars apnane ke qabil

wo afsana hai dohrane ke qabil

tumhaari zulf aur shane ke qabil

ye hai zanjir diwane ke qabil

hamin the ek faqat shayad hamin the

teri mahfil mein kaam aane ke qabil

bane hai muddaton mein dil bane hai

shahid-e-naz kahlane ke qabil

meri qismat kahan hai main kahan hun

dayar-e-dost mein jaane ke qabil

ye ahl-e-gulsitan gar chahen 'zamzam'

chaman hai to bahaar aane ke qabil