wo dil ki jhil mein utra tha ek saat ko

vo dil kī jhiil meñ utrā thā ek saa.at ko

ye umr ho ga.ī hai sahte is malāmat ko

kahīñ to sāya-e-dīvār-e-āgahī mil jaa.e

koī to aa.e kare ḳhatm is masāfat ko

tumhīñ se mil ke mirī dil se āshnā.ī ho

tumhāre baad hī jaanā hai is qayāmat ko

vo ek shaḳhs mujhe kar gayā sabhī se judā

taras rahā huuñ maiñ jis shaḳhs kī rifāqat ko

ajiib log haiñ is shahr ke ba-nām-e-vafā

havā.eñ dete haiñ har sho.ala-e-adāvat ko

javāz bhī to koī ho mirī tabāhī kā

chhupā rahe ho tabassum meñ kyoñ nadāmat ko

ga.e dinoñ kā manāte ho sog phir 'ābid'

hameñ yaqīñ hai na badloge apnī aadat ko

wo dil ki jhil mein utra tha ek saat ko

ye umr ho gai hai sahte is malamat ko

kahin to saya-e-diwar-e-agahi mil jae

koi to aae kare KHatm is masafat ko

tumhin se mil ke meri dil se aashnai ho

tumhaare baad hi jaana hai is qayamat ko

wo ek shaKHs mujhe kar gaya sabhi se juda

taras raha hun main jis shaKHs ki rifaqat ko

ajib log hain is shahr ke ba-nam-e-wafa

hawaen dete hain har shoala-e-adawat ko

jawaz bhi to koi ho meri tabahi ka

chhupa rahe ho tabassum mein kyon nadamat ko

gae dinon ka manate ho sog phir 'abid'

hamein yaqin hai na badloge apni aadat ko