wo dil mein rahte hain dil ka nishan nahin malum

vo dil meñ rahte haiñ dil kā nishāñ nahīñ ma.alūm

makīn DhūñD rahā huuñ makāñ nahīñ ma.alūm

sukūn paane lagā huuñ ġham-e-mohabbat meñ

kahāñ ga.iiñ mirī be-tābiyāñ nahīñ ma.alūm

masarratoñ kā to sat.hī mutāla hai magar

ġham-e-hayāt kī gahrā.iyāñ nahīñ ma.alūm

fuġhāñ nasīb kī vāraftagī are tauba

fuġhāñ nasīb ko vaj.h-e-fuġhāñ nahīñ ma.alūm

chaman kī fikr bhī kar āshiyāñ kī fikr ke saath

kidhar ko TuuT paḌeñ bijliyāñ nahīñ ma.alūm

vafā-shi.ār tahī-dast aa.e manzil par

kahāñ kahāñ pe luTā kārvāñ nahīñ ma.alūm

'shakīl' aa.ina hai daur-e-inqilāb magar

ma.āl-e-qismat-e-hindostāñ nahīñ ma.alūm

wo dil mein rahte hain dil ka nishan nahin malum

makin DhunD raha hun makan nahin malum

sukun pane laga hun gham-e-mohabbat mein

kahan gain meri be-tabiyan nahin malum

masarraton ka to sathi mutala hai magar

gham-e-hayat ki gahraiyan nahin malum

fughan nasib ki waraftagi are tauba

fughan nasib ko wajh-e-fughan nahin malum

chaman ki fikr bhi kar aashiyan ki fikr ke sath

kidhar ko TuT paDen bijliyan nahin malum

wafa-shiar tahi-dast aae manzil par

kahan kahan pe luTa karwan nahin malum

'shakil' aaina hai daur-e-inqilab magar

maal-e-qismat-e-hindostan nahin malum