wo dil nahin hai jis mein teri aarzu na ho

vo dil nahīñ hai jis meñ tirī aarzū na ho

vo gul nahīñ nasīb jise rang-o-bū na ho

dil jītne ko yaar kā jaatā hai bazm meñ

koshish meñ kāmyāb ḳhudāyā adū na ho

aatā nahīñ hai sher mire zehn meñ koī

jab tak ki vo hasīn mire rū-ba-rū na ho

duniyā pe dil kī baat na khul jaa.e is liye

nazroñ se ho zabāñ se agar guftugū na ho

baaqī shab-e-firāq hai dil ho gayā tahī

phir aañkh kaise ro.e jo dil meñ lahū na ho

ai rab hamāre dil meñ bhī aa kar qiyām kar

auqāt us kī kyā hai ki jis dil meñ tū na ho

'zākir' amal se bante haiñ insān zī-vaqār

zinda nahīñ vo log jinheñ justujū na ho

wo dil nahin hai jis mein teri aarzu na ho

wo gul nahin nasib jise rang-o-bu na ho

dil jitne ko yar ka jata hai bazm mein

koshish mein kaamyab KHudaya adu na ho

aata nahin hai sher mere zehn mein koi

jab tak ki wo hasin mere ru-ba-ru na ho

duniya pe dil ki baat na khul jae is liye

nazron se ho zaban se agar guftugu na ho

baqi shab-e-firaq hai dil ho gaya tahi

phir aankh kaise roe jo dil mein lahu na ho

ai rab hamare dil mein bhi aa kar qiyam kar

auqat us ki kya hai ki jis dil mein tu na ho

'zakir' amal se bante hain insan zi-waqar

zinda nahin wo log jinhen justuju na ho