wo dilkashi jo tere husn aur jamal mein hai

vo dilkashī jo tire husn aur jamāl meñ hai

usī kā aks farozāñ mire ḳhayāl meñ hai

ḳhumār-e-tishna-labī mausam-e-junūñ-ḳhezī

kabhī ye hijr meñ hai aur kabhī visāl meñ hai

kabhī sahar meñ kabhī shaam meñ hai jalva-numā

vo raushnī jo tire husn-e-be-misāl meñ hai

vo naġhmagī jo daraḳhshāñ hai tere jalvoñ meñ

na roz-o-shab meñ farozāñ na māh-o-sāl meñ hai

savād-e-shām meñ taarī hai sehr aur fusūñ

usī kā rang tire husn-e-lā-zavāl meñ hai

hanūz jalva-numā zindagī meñ ho na sakī

vo tamkanat jo tire qahr aur jalāl meñ hai

shikast-o-reḳht se miltī hai zindagī ko numūd

mire vajūd kā unsur tire kamāl meñ hai

kisī jihat meñ ravāñ hai ye kārvān-e-hayāt

bas ek raḳht-e-safar hai jo māh-o-sāl meñ hai

sahar qarīb hai bujhtī haiñ shab kī qindīleñ

falak pe ek sitārā hai so zavāl meñ hai

tire jamāl se rāh-e-visāl tak har ek

jo marhala hai mirī dastaras ke jaal meñ hai

ab aur mujh ko rulā.egī kyā shab-e-hijrāñ

mirā nasīb tire kūcha-e-malāl meñ hai

bahut kashish hai tirī sehr-kār āñkhoñ meñ

ajiib husn-e-adā tere ḳhadd-o-ḳhāl meñ hai

junūñ kī raah meñ har samt hai fareb-e-nazar

chalūñ junūb kī jānib qadam shumāl meñ hai

javāb us ne diyā hai ai nāma-bar lekin

vo baat ab bhī nahīñ jo mire savāl meñ hai

'sabā' ajiib sā jaadū hai us kī āñkhoñ meñ

na sāmrī meñ hai nargis meñ na ġhazāl meñ hai

wo dilkashi jo tere husn aur jamal mein hai

usi ka aks farozan mere KHayal mein hai

KHumar-e-tishna-labi mausam-e-junun-KHezi

kabhi ye hijr mein hai aur kabhi visal mein hai

kabhi sahar mein kabhi sham mein hai jalwa-numa

wo raushni jo tere husn-e-be-misal mein hai

wo naghmagi jo daraKHshan hai tere jalwon mein

na roz-o-shab mein farozan na mah-o-sal mein hai

sawad-e-sham mein tari hai sehr aur fusun

usi ka rang tere husn-e-la-zawal mein hai

hanuz jalwa-numa zindagi mein ho na saki

wo tamkanat jo tere qahr aur jalal mein hai

shikast-o-reKHt se milti hai zindagi ko numud

mere wajud ka unsur tere kamal mein hai

kisi jihat mein rawan hai ye karwan-e-hayat

bas ek raKHt-e-safar hai jo mah-o-sal mein hai

sahar qarib hai bujhti hain shab ki qindilen

falak pe ek sitara hai so zawal mein hai

tere jamal se rah-e-visal tak har ek

jo marhala hai meri dastaras ke jal mein hai

ab aur mujh ko rulaegi kya shab-e-hijran

mera nasib tere kucha-e-malal mein hai

bahut kashish hai teri sehr-kar aankhon mein

ajib husn-e-ada tere KHadd-o-KHal mein hai

junun ki rah mein har samt hai fareb-e-nazar

chalun junub ki jaanib qadam shumal mein hai

jawab us ne diya hai ai nama-bar lekin

wo baat ab bhi nahin jo mere sawal mein hai

'saba' ajib sa jadu hai us ki aankhon mein

na samri mein hai nargis mein na ghazal mein hai