wo din jo bit gaya phir kisi ne paya nahin

vo din jo biit gayā phir kisī ne paayā nahīñ

kabhī kamāñ se koī tiir jā ke aayā nahīñ

Thahar gayā hai sar-e-markaz-e-falak sūraj

ye vaqt vo hai ki dīvār meñ bhī saayā nahīñ

ye be-dilī-e-musalsal ye rañj-e-nā-mālūm

tujhe bhulā ke bhī ham ne tujhe bhulāyā nahīñ

asīr-e-bazm is āvārgī ko kam na samajh

jo apne saath guzārā vo din gañvāyā nahīñ

bichhaḌne se bhī sivā hai ye ġham ki shām-e-firāq

koī sitāra in āñkhoñ meñ jhilmilāyā nahīñ

bas apnā naam vo kāġhaz pe likh ke chhoḌ gayā

maiñ so rahā thā to us ne mujhe jagāyā nahīñ

maiñ apne ahd kī takmīl tujh se kyā kartā

ki maiñ ne ḳhud se bhī va.ada koī nibhāyā nahīñ

'farāsat' ek to kam-himmatī mujhī meñ thī

phir us nazar ne bhī kuchh hausla baḌhāyā nahīñ

wo din jo bit gaya phir kisi ne paya nahin

kabhi kaman se koi tir ja ke aaya nahin

Thahar gaya hai sar-e-markaz-e-falak suraj

ye waqt wo hai ki diwar mein bhi saya nahin

ye be-dili-e-musalsal ye ranj-e-na-malum

tujhe bhula ke bhi hum ne tujhe bhulaya nahin

asir-e-bazm is aawargi ko kam na samajh

jo apne sath guzara wo din ganwaya nahin

bichhaDne se bhi siwa hai ye gham ki sham-e-firaq

koi sitara in aankhon mein jhilmilaya nahin

bas apna nam wo kaghaz pe likh ke chhoD gaya

main so raha tha to us ne mujhe jagaya nahin

main apne ahd ki takmil tujh se kya karta

ki main ne KHud se bhi wada koi nibhaya nahin

'farasat' ek to kam-himmati mujhi mein thi

phir us nazar ne bhi kuchh hausla baDhaya nahin