wo ek lamha jo tark-e-talluqat ka tha

vo ek lamha jo tark-e-ta.alluqāt kā thā

phir us ke baad kahāñ koī pal hayāt kā thā

jo mas.ala thā vo bāham zarūriyāt kā thā

mire farār kā aur aap kī najāt kā thā

zabāñ hijāb kī lahja takallufāt kā thā

laboñ ke biich meñ parda mukālamāt kā thā

vo ek phuul jo nāzuk thā saare phūloñ meñ

usī pe mujh ko gumāñ pattharoñ kī zaat kā thā

larazte kāñpte se lab jhukī jhukī sī nazar

hayā to aaj kī thī zikr kal kī raat kā thā

kisī ke dil kā janāza uThā thā bastī se

yuuñ qāfila to kisī lauTtī barāt kā thā

wo ek lamha jo tark-e-talluqat ka tha

phir us ke baad kahan koi pal hayat ka tha

jo masala tha wo baham zaruriyat ka tha

mere farar ka aur aap ki najat ka tha

zaban hijab ki lahja takallufat ka tha

labon ke bich mein parda mukalamat ka tha

wo ek phul jo nazuk tha sare phulon mein

usi pe mujh ko guman pattharon ki zat ka tha

larazte kanpte se lab jhuki jhuki si nazar

haya to aaj ki thi zikr kal ki raat ka tha

kisi ke dil ka janaza uTha tha basti se

yun qafila to kisi lauTti baraat ka tha