wo ek pal ko mujhe itna sach laga tha ki bas

vo ek pal ko mujhe itnā sach lagā thā ki bas

vo hādisa thā magar aisā hādisa thā ki bas

vo pahle pahle milā thā to yuuñ sajā thā ki bas

phir us ke ba.ad to aisā ujaḌ gayā thā ki bas

maiñ apne gaañv ke dīvār-o-dar pe kyā likhtā

vahāñ to aisā añdherā chunā huā thā ki bas

vo ek aam sā lahja thā bhīge mausam kā

nigāh-o-dil meñ magar yuuñ utar gayā thā ki bas

bas ek moḌ talak ham-safar dilāse the

phir us ke ba.ad to vo saḳht marhala thā ki bas

ġharīb TuuT na jaatā to aur kyā kartā

tamām umr zamāne se yuuñ laḌā thā ki bas

na aa sakā vo mire ghar to kyā huā 'nāzim'

ki rāsta bhī to aisā ghumāv kā thā ki bas

wo ek pal ko mujhe itna sach laga tha ki bas

wo hadisa tha magar aisa hadisa tha ki bas

wo pahle pahle mila tha to yun saja tha ki bas

phir us ke baad to aisa ujaD gaya tha ki bas

main apne ganw ke diwar-o-dar pe kya likhta

wahan to aisa andhera chuna hua tha ki bas

wo ek aam sa lahja tha bhige mausam ka

nigah-o-dil mein magar yun utar gaya tha ki bas

bas ek moD talak ham-safar dilase the

phir us ke baad to wo saKHt marhala tha ki bas

gharib TuT na jata to aur kya karta

tamam umr zamane se yun laDa tha ki bas

na aa saka wo mere ghar to kya hua 'nazim'

ki rasta bhi to aisa ghumaw ka tha ki bas