wo ek shaKHs jo humse kabhi mila bhi nahin

vo ek shaḳhs jo ham se kabhī milā bhī nahīñ

hamāre saath hai aur ham se vo judā bhī nahīñ

qalam uThāo to kāġhaz se vo ubhartā hai

dil-o-dimāġh se ye rabt TūTtā bhī nahīñ

saje to kaise saje anjuman ḳhayāloñ kī

vo bāda-kash bhī nahīñ ab vo mai-kada bhī nahīñ

baġhair barse ghaTā.eñ guzar ga.iiñ ab ke

yūñhī chalā gayā mausam ne kuchh kahā bhī nahīñ

vo sāmne haiñ magar dil bujhā bujhā sā hai

shikāyateñ bhī nahīñ arz-e-mudda.ā bhī nahīñ

har ek tīr-e-sitam hañs ke sah liyā dil par

ḳhafā vo phir bhī haiñ ham ne to kuchh kahā bhī nahīñ

ġharīb-e-shahr haiñ phirte haiñ ajnabī kī tarah

koī rafīq nahīñ koī āshnā bhī nahīñ

huzūr aap ne be-kār pher lī āñkheñ

burā sahī vo magar is qadar burā bhī nahīñ

wo ek shaKHs jo hum se kabhi mila bhi nahin

hamare sath hai aur hum se wo juda bhi nahin

qalam uThao to kaghaz se wo ubharta hai

dil-o-dimagh se ye rabt TuTta bhi nahin

saje to kaise saje anjuman KHayalon ki

wo baada-kash bhi nahin ab wo mai-kada bhi nahin

baghair barse ghaTaen guzar gain ab ke

yunhi chala gaya mausam ne kuchh kaha bhi nahin

wo samne hain magar dil bujha bujha sa hai

shikayaten bhi nahin arz-e-muddaa bhi nahin

har ek tir-e-sitam hans ke sah liya dil par

KHafa wo phir bhi hain hum ne to kuchh kaha bhi nahin

gharib-e-shahr hain phirte hain ajnabi ki tarah

koi rafiq nahin koi aashna bhi nahin

huzur aap ne be-kar pher li aankhen

bura sahi wo magar is qadar bura bhi nahin