wo gah-gah tera iltifat kya kahna

vo gāh-gāh tirā iltifāt kyā kahnā

bhulā diyā hai ġham-e-kā.enāt kyā kahnā

mirī nigāh ko jannat banā diyā tū ne

tire shabāb kā jān-e-hayāt kyā kahnā

mirī nigāh meñ kaunain kī haqīqat kyā

tirī nazar hai mirī kā.enāt kyā kahnā

machal rahe haiñ tasavvur meñ husn ke jalve

taḌap rahī hai judā.ī kī raat kyā kahnā

har ek ġham se bachāyā ġham-e-mohabbat ne

ye jāñ-navāz tarīq-e-najāt kyā kahnā

nazar ke sāmne terā badan thā ā.īna

vo be-panāh tajallī kī raat kyā kahnā

tumheñ sukūn hai lekin mujhe sukūn nahīñ

hayāt-e-ishq kī ye vārdāt kyā kahnā

tirī nigāh ne ulfat kā saaz chheḌ diyā

hayāt ban ga.ī asl-e-hayāt kyā kahnā

kisī kī talḳh-kalāmī kā zikr kyā 'saifī'

har ek baat hai shāḳh-e-nabāt kyā kahnā

wo gah-gah tera iltifat kya kahna

bhula diya hai gham-e-kaenat kya kahna

meri nigah ko jannat bana diya tu ne

tere shabab ka jaan-e-hayat kya kahna

meri nigah mein kaunain ki haqiqat kya

teri nazar hai meri kaenat kya kahna

machal rahe hain tasawwur mein husn ke jalwe

taDap rahi hai judai ki raat kya kahna

har ek gham se bachaya gham-e-mohabbat ne

ye jaan-nawaz tariq-e-najat kya kahna

nazar ke samne tera badan tha aaina

wo be-panah tajalli ki raat kya kahna

tumhein sukun hai lekin mujhe sukun nahin

hayat-e-ishq ki ye wardat kya kahna

teri nigah ne ulfat ka saz chheD diya

hayat ban gai asl-e-hayat kya kahna

kisi ki talKH-kalami ka zikr kya 'saifi'

har ek baat hai shaKH-e-nabaat kya kahna