wo gham jo hasil-e-hasti hai mil chuka ki nahin

vo ġham jo hāsil-e-hastī hai mil chukā ki nahīñ

phir aur kaun sā hai lutf dil-kushā ki nahīñ

mizāj-e-dard-e-tamannā badal gayā ki nahīñ

vafā ne rañj ko rāhat banā liyā ki nahīñ

jo dil meñ toḌtī rahtī thī neshtar har dam

huī vo kāvish-e-jāñ kā vo jāñ-fazā ki nahīñ

jalā diyā thā lahū jis ne dil kī rag rag kā

vo soz-e-ātish-e-ġham raas aa gayā ki nahīñ

nazar nazar pe hai paiham tajalliyoñ kā nuzūl

talāsh-e-husn kā haq ho gayā adā ki nahīñ

zahe surūr ḳhalish ye ḳhabar nahīñ dil ko

jo chubh gayā thā vo kāñTā nikal gayā ki nahīñ

karishma apnī tavajjoh kā tum ne dekh liyā

Thahar ga.ī mirī umr-e-gurez-pā ki nahīñ

zarā batāo agar tum ne sab kī baat sunī

mire sukūt ne bhī tum se kuchh kahā ki nahīñ

kahāñ ye hosh nashāt-e-talab meñ ai 'kaukab'

na-gufta harf-e-talab sun liyā gayā ki nahīñ

wo gham jo hasil-e-hasti hai mil chuka ki nahin

phir aur kaun sa hai lutf dil-kusha ki nahin

mizaj-e-dard-e-tamanna badal gaya ki nahin

wafa ne ranj ko rahat bana liya ki nahin

jo dil mein toDti rahti thi neshtar har dam

hui wo kawish-e-jaan ka wo jaan-faza ki nahin

jala diya tha lahu jis ne dil ki rag rag ka

wo soz-e-atish-e-gham ras aa gaya ki nahin

nazar nazar pe hai paiham tajalliyon ka nuzul

talash-e-husn ka haq ho gaya ada ki nahin

zahe surur KHalish ye KHabar nahin dil ko

jo chubh gaya tha wo kanTa nikal gaya ki nahin

karishma apni tawajjoh ka tum ne dekh liya

Thahar gai meri umr-e-gurez-pa ki nahin

zara batao agar tum ne sab ki baat suni

mere sukut ne bhi tum se kuchh kaha ki nahin

kahan ye hosh nashat-e-talab mein ai 'kaukab'

na-gufta harf-e-talab sun liya gaya ki nahin