wo ghaDi dil pe thi qayamat ki

vo ghaḌī dil pe thī qayāmat kī

jab tirī chāhatoñ ne hijrat kī

kyā koī husn kā sahīfa thā

aañkh ne der tak tilāvat kī

aur shiddat se yaad aaya vo

jab use bhūlne kī jur.at kī

dil jalāo agar charāġh bujheñ

raushnī kam na ho mohabbat kī

māñgtī hai lahū ke nazrāne

ham se har iiñT is imārat kī

us ne kī mujh ko sabr kī talqīn

dī duā maiñ ne istaqāmat kī

qatl-ḳhānoñ meñ jī rahe haiñ ham

daad diije hamārī himmat kī

dekh tīroñ se phuul chhalnī haiñ

koī had hotī hai adāvat kī

qasr-e-fir.aunñ meñ pal rahe haiñ kalīm

kyā ajab shaan hai mashiyyat kī

bujh chalī sham.a-e-bazm-e-nāv-nosh

sar pe tayyāriyāñ haiñ rehlat kī

dard jab had se baḌh gayā 'bazmī'

dard se dard kī shikāyat kī

wo ghaDi dil pe thi qayamat ki

jab teri chahaton ne hijrat ki

kya koi husn ka sahifa tha

aankh ne der tak tilawat ki

aur shiddat se yaad aaya wo

jab use bhulne ki jurat ki

dil jalao agar charagh bujhen

raushni kam na ho mohabbat ki

mangti hai lahu ke nazrane

hum se har inT is imarat ki

us ne ki mujh ko sabr ki talqin

di dua main ne istaqamat ki

qatl-KHanon mein ji rahe hain hum

dad dije hamari himmat ki

dekh tiron se phul chhalni hain

koi had hoti hai adawat ki

qasr-e-firaunn mein pal rahe hain kalim

kya ajab shan hai mashiyyat ki

bujh chali shama-e-bazm-e-naw-nosh

sar pe tayyariyan hain rehlat ki

dard jab had se baDh gaya 'bazmi'

dard se dard ki shikayat ki