wo hain sitamgar phir bhi sitam par ab un ko sharmae kaun

vo haiñ sitamgar phir bhī sitam par ab un ko sharmā.e kaun

dil meñ kitne zaḳhm lage haiñ jā ke unheñ dikhlā.e kaun

mausam-e-bārāñ raat añdherī andesha rusvā.ī kā

in hālāt meñ dard baTāne ġham-ḳhāne meñ aa.e kaun

kaash kahīñ vo mil jaate to un se itnā ham kahte

tum ne aag lagā.ī dil meñ lekin ise bujhā.e kaun

jin kī diid ko nazreñ tarseñ jin ke liye dil ho bechain

merī ḳhātir lekin un ko mere ghar tak laa.e kaun

ek hamāre uTh aane se duur talak sannāTā hai

mahfil-e-yārāñ suunī paḌī hai naġhma-e-ulfat gaa.e kaun

mujh ko ḳhabar hai us kī nazar meñ jins-e-vafā kī qadr nahīñ

baat bajā hai lekin yaaro is dil ko samjhā.e kaun

wo hain sitamgar phir bhi sitam par ab un ko sharmae kaun

dil mein kitne zaKHm lage hain ja ke unhen dikhlae kaun

mausam-e-baran raat andheri andesha ruswai ka

in haalat mein dard baTane gham-KHane mein aae kaun

kash kahin wo mil jate to un se itna hum kahte

tum ne aag lagai dil mein lekin ise bujhae kaun

jin ki did ko nazren tarsen jin ke liye dil ho bechain

meri KHatir lekin un ko mere ghar tak lae kaun

ek hamare uTh aane se dur talak sannaTa hai

mahfil-e-yaran suni paDi hai naghma-e-ulfat gae kaun

mujh ko KHabar hai us ki nazar mein jins-e-wafa ki qadr nahin

baat baja hai lekin yaro is dil ko samjhae kaun