wo hain tayyar imarat ko girane wale

vo haiñ tayyār imārat ko girāne vaale

tū kahāñ hai mirī buniyād uThāne vaale

sochtā huuñ sar-e-sāhil khaḌā jaane kab se

Duub jaate haiñ kahāñ paar lagāne vaale

un se kah do na kareñ dast-e-havas ham pe darāz

ham to piine se ziyāda haiñ pilāne vaale

ġham kī ta.abīr se pahle mujhe mālūm na thā

mere ash.ār ko sañgīt banāne vaale

bādbāñ tez havāoñ se phaTe jaate haiñ

Duub jaa.eñ na kahīñ paar lagāne vaale

raat hotī hai to jalte haiñ mirī āñkhoñ meñ

ye sitāre jo haiñ sūraj ke gharāne vaale

kuchh to hai jis se hai baaqī tirī duniyā kā javāz

kam hī dekhe haiñ ta.alluq ko nibhāne vaale

yūñhī me.aar badalte rahe duniyā ke agar

phir kahāñ ā.eñge milne vahī aane vaale

bāñTte phirte haiñ har samt añdheroñ ko 'nabīl'

silsila apne charāġhoñ kā baḌhāne vaale

wo hain tayyar imarat ko girane wale

tu kahan hai meri buniyaad uThane wale

sochta hun sar-e-sahil khaDa jaane kab se

Dub jate hain kahan par lagane wale

un se kah do na karen dast-e-hawas hum pe daraaz

hum to pine se ziyaada hain pilane wale

gham ki tabir se pahle mujhe malum na tha

mere ashaar ko sangit banane wale

baadban tez hawaon se phaTe jate hain

Dub jaen na kahin par lagane wale

raat hoti hai to jalte hain meri aankhon mein

ye sitare jo hain suraj ke gharane wale

kuchh to hai jis se hai baqi teri duniya ka jawaz

kam hi dekhe hain talluq ko nibhane wale

yunhi mear badalte rahe duniya ke agar

phir kahan aaenge milne wahi aane wale

banTte phirte hain har samt andheron ko 'nabil'

silsila apne charaghon ka baDhane wale