wo ham-KHayal nahin phir bhi sath chalta hai

vo ham-ḳhayāl nahīñ phir bhī saath chaltā hai

yahī tazād to jīvan meñ rang bhartā hai

maiñ us kī raa.e se kuchh itnā mutma.in bhī nahīñ

mohar-ba-lab huuñ ki sikka usī kā chaltā hai

maiñ ik charāġh thā tūfāñ se dostī kar lī

ḳhirad na samjhe use par junūñ samajhtā hai

yazīd morcha jiitā thā jang haarā thā

ye sach ragoñ meñ mire inqalāb bhartā hai

us ik ġharīb se itne savāl mat pūchho

jo hāl-e-zār bhī kahte hue hichaktā hai

vo ishtihār meñ sab kuchh hī pā gayā lekin

ġharīb-e-shahr to til til ko ab bhī martā hai

yaqīñ hai us ko sila ḳhuub pā.ūñgā ab to

vo jaañ bhī letā hai aur mushtahar bhī kartā hai

zamīñ ke naaz uThā.egā kaun ai 'shārib'

kisān ab to nirāshā ke ban meñ rahtā hai

wo ham-KHayal nahin phir bhi sath chalta hai

yahi tazad to jiwan mein rang bharta hai

main us ki rae se kuchh itna mutmain bhi nahin

mohar-ba-lab hun ki sikka usi ka chalta hai

main ek charagh tha tufan se dosti kar li

KHirad na samjhe use par junun samajhta hai

yazid morcha jita tha jang haara tha

ye sach ragon mein mere inqalab bharta hai

us ek gharib se itne sawal mat puchho

jo haal-e-zar bhi kahte hue hichakta hai

wo ishtihaar mein sab kuchh hi pa gaya lekin

gharib-e-shahr to til til ko ab bhi marta hai

yaqin hai us ko sila KHub paunga ab to

wo jaan bhi leta hai aur mushtahar bhi karta hai

zamin ke naz uThaega kaun ai 'shaarib'

kisan ab to nirasha ke ban mein rahta hai