wo hum nahin hain ki gulshan par iKHtiyar ke baad

vo ham nahīñ haiñ ki gulshan par iḳhtiyār ke baad

bahār ko bhī taraste raheñ bahār ke baad

nizām-e-dahr jo hai muntashir to hone do

ki nazm-e-dahr sañvartā hai intishār ke baad

abhī to sub.h kī pahlī kiran hī phūTī hai

jamāl-e-sub.h zarā dekhnā nikhār ke baad

qadam qadam pe milegā hayāt-e-nau kā surāġh

balā-kashān-e-mohabbat ko sair-e-dār ke ba.ad

unhīñ se pūchhiye kaif-e-hayāt kyā shai hai

jo mutma.in haiñ ġham-e-zindagī se pyaar ke baad

dar-e-habīb pe baiThā huuñ sar jhukā.e hue

tamām silsila-e-tark-o-iḳhtiyār ke baad

ġham-e-hayāt-o-ġham-e-kā.enāt bhī hai aziiz

kuchh apnī fikr bhī lekin ḳhayāl-e-yār ke baad

ujaal de jo ruḳh-e-shām-e-zindagī ko 'atīq'

vo sub.h aa.egī kis sub.h-e-intizār ke baad

wo hum nahin hain ki gulshan par iKHtiyar ke baad

bahaar ko bhi taraste rahen bahaar ke baad

nizam-e-dahr jo hai muntashir to hone do

ki nazm-e-dahr sanwarta hai intishaar ke baad

abhi to subh ki pahli kiran hi phuTi hai

jamal-e-subh zara dekhna nikhaar ke baad

qadam qadam pe milega hayat-e-nau ka suragh

bala-kashan-e-mohabbat ko sair-e-dar ke baad

unhin se puchhiye kaif-e-hayat kya shai hai

jo mutmain hain gham-e-zindagi se pyar ke baad

dar-e-habib pe baiTha hun sar jhukae hue

tamam silsila-e-tark-o-iKHtiyar ke baad

gham-e-hayat-o-gham-e-kaenat bhi hai aziz

kuchh apni fikr bhi lekin KHayal-e-yar ke baad

ujal de jo ruKH-e-sham-e-zindagi ko 'atiq'

wo subh aaegi kis subh-e-intizar ke baad