wo humse lakh mohabbat mein bad-guman se rahe

vo ham se laakh mohabbat meñ bad-gumāñ se rahe

ham un ke saath magar phir bhī naqd-e-jāñ se rahe

lagī haiñ sho'la-bayānī kī tohmateñ aksar

ham un ke shahr meñ har-chand be-zabāñ se rahe

tamāzat-e-ġham-e-daurāñ hameñ jalā na sakī

tire ḳhayāl ke har samt sā.ebāñ se rahe

usī zamīn ke zarroñ meñ kho ga.e ab ham

ki jis zamīñ pe kabhī ban ke āsmāñ se rahe

'hayāt' kis ko thā ilhām jaur-e-pinhāñ kā

ki apne dil pe bazāhir vo mehrbāñ se rahe

wo hum se lakh mohabbat mein bad-guman se rahe

hum un ke sath magar phir bhi naqd-e-jaan se rahe

lagi hain sho'la-bayani ki tohmaten aksar

hum un ke shahr mein har-chand be-zaban se rahe

tamazat-e-gham-e-dauran hamein jala na saki

tere KHayal ke har samt saeban se rahe

usi zamin ke zarron mein kho gae ab hum

ki jis zamin pe kabhi ban ke aasman se rahe

'hayat' kis ko tha ilham jaur-e-pinhan ka

ki apne dil pe bazahir wo mehrban se rahe