wo harf-o-naqsh se Khaali kitab mangta hai

vo harf-o-naqsh se ḳhālī kitāb māñgtā hai

savāl kartā nahīñ hai javāb māñgtā hai

maiñ saarā saal hī rakhtā huuñ apne zaḳhm hare

vo saarā saal hī taaza gulāb māñgtā hai

maiñ reza reza ise TuuT kar dikhātā huuñ

vo lamhe lamhe kā mujh se hisāb māñgtā hai

sunā hai us kī mohabbat hai māvarā-e-hayāt

so saarā shahr hī marne ke ḳhvāb māñgtā hai

vo is tarah bhī parakhtā hai dostoñ kā ḳhulūs

ki but hai mom kā aur āftāb māñgtā hai

har ek shaḳhs hai us kī karāmatoñ kā asiir

usī se hosh usī se sharāb māñgtā hai

vo pahroñ ghūrtā rahtā hai ā.īnoñ ko 'na'īm'

jo kho chukā hai vo 'ahd-e-shabāb māñgtā hai

wo harf-o-naqsh se KHali kitab mangta hai

sawal karta nahin hai jawab mangta hai

main sara sal hi rakhta hun apne zaKHm hare

wo sara sal hi taza gulab mangta hai

main reza reza ise TuT kar dikhata hun

wo lamhe lamhe ka mujh se hisab mangta hai

suna hai us ki mohabbat hai mawara-e-hayat

so sara shahr hi marne ke KHwab mangta hai

wo is tarah bhi parakhta hai doston ka KHulus

ki but hai mom ka aur aaftab mangta hai

har ek shaKHs hai us ki karamaton ka asir

usi se hosh usi se sharab mangta hai

wo pahron ghurta rahta hai aainon ko 'na'im'

jo kho chuka hai wo 'ahd-e-shabab mangta hai