wo hasin jalwa-ba-dosh hai koi parda hai na naqab hai

vo hasīn jalva-ba-dosh hai koī parda hai na naqāb hai

tirā parda hai tirī pardagī ye hijāb terā hijāb hai

tirī chashm-e-mast ke daur meñ koī jaam jām-e-sharāb hai

jo hai ahl-e-dīd vo mast hai jo hai ahl-e-dil vo ḳharāb hai

jo taqāzā thā to vo tuur thā jo talab thī to vo zuhūr thā

na taqāzā hai na talab hai ab na savāl hai na javāb hai

ise saath le chalo rahbaro ki zarā na.ī hai rah-e-adam

ye savār-e-umr-e-ravāñ mirā sar-e-rāh pā-ba-rikāb hai

use khel samjhā to bach rahā na samajh sakā to ulajh gayā

use aañkh khol ke dekhnā tirī zindagī kā ye ḳhvāb hai

na hai ḳhauf ahl-e-kitāb se na hirās ahl-e-hisāb se

vo karam hai mere karīm kā na hisāb hai na kitāb hai

kisī ilm se na ise ġharaz na kisī adab se hai vāsta

tirā dard jis kā hisāb hai tirā husn jis kī kitāb hai

dil-e-pur-havas tujhe sair-e-hastī-e-be-sukūñ kī majāl kyā

ki misāl-e-mauj-e-ravāñ hai ye tirī chashm chashm-e-habāb hai

na ulajh numā.ish-e-dahr ke kabhī dām-e-naqsh-o-nigār meñ

jo nigār hai vo parīda hai jo hai naqsh naqsh-bar-āb hai

vahī nuur jis se haiñ nuur nuur hazāroñ nayyar-o-mehr-o-māh

jo usī ke saa.e meñ aa gayā faqat us ko diid kī taab hai

ba-ḳhulūs 'aiman'-e-be-navā usī āstāñ pe jabīñ jhukā

koī be-murād nahīñ gayā shah-e-do-jahāñ kī janāb hai

wo hasin jalwa-ba-dosh hai koi parda hai na naqab hai

tera parda hai teri pardagi ye hijab tera hijab hai

teri chashm-e-mast ke daur mein koi jam jam-e-sharab hai

jo hai ahl-e-did wo mast hai jo hai ahl-e-dil wo KHarab hai

jo taqaza tha to wo tur tha jo talab thi to wo zuhur tha

na taqaza hai na talab hai ab na sawal hai na jawab hai

ise sath le chalo rahbaro ki zara nai hai rah-e-adam

ye sawar-e-umr-e-rawan mera sar-e-rah pa-ba-rikab hai

use khel samjha to bach raha na samajh saka to ulajh gaya

use aankh khol ke dekhna teri zindagi ka ye KHwab hai

na hai KHauf ahl-e-kitab se na hiras ahl-e-hisab se

wo karam hai mere karim ka na hisab hai na kitab hai

kisi ilm se na ise gharaz na kisi adab se hai wasta

tera dard jis ka hisab hai tera husn jis ki kitab hai

dil-e-pur-hawas tujhe sair-e-hasti-e-be-sukun ki majal kya

ki misal-e-mauj-e-rawan hai ye teri chashm chashm-e-habab hai

na ulajh numaish-e-dahr ke kabhi dam-e-naqsh-o-nigar mein

jo nigar hai wo parida hai jo hai naqsh naqsh-bar-ab hai

wahi nur jis se hain nur nur hazaron nayyar-o-mehr-o-mah

jo usi ke sae mein aa gaya faqat us ko did ki tab hai

ba-KHulus 'aiman'-e-be-nawa usi aastan pe jabin jhuka

koi be-murad nahin gaya shah-e-do-jahan ki janab hai