wo hi andaz-e-dilbari hai abhi

vo hī andāz-e-dilbarī hai abhī

us kī bātoñ meñ dilkashī hai abhī

kashti-e-dil bahak na jaa.e kahīñ

mauj-dar-mauj gum rahī hai abhī

kisī tūfān kā ishāra hai

ye jo saffāk ḳhāmushī hai abhī

raakh se ab bhī uTh rahā hai dhuāñ

yād-e-māzī sulag rahī hai abhī

'ishq meñ sab to had se paar hue

par hameñ ehtiyāt sī hai abhī

'ahd-o-paimāñ kareñge fursat se

koī jaldī nahīñ paḌī hai abhī

kyā mohabbat hī kī 'alāmat hai

us kī palkoñ meñ jo namī hai abhī

wo hi andaz-e-dilbari hai abhi

us ki baaton mein dilkashi hai abhi

kashti-e-dil bahak na jae kahin

mauj-dar-mauj gum rahi hai abhi

kisi tufan ka ishaara hai

ye jo saffak KHamushi hai abhi

rakh se ab bhi uTh raha hai dhuan

yaad-e-mazi sulag rahi hai abhi

'ishq mein sab to had se par hue

par hamein ehtiyat si hai abhi

'ahd-o-paiman karenge fursat se

koi jaldi nahin paDi hai abhi

kya mohabbat hi ki 'alamat hai

us ki palkon mein jo nami hai abhi