wo husn aankh se dekha hua yaqin mujhe

vo husn aañkh se dekhā huā yaqīn mujhe

agarche roz batāte the zā.erīn mujhe

maiñ aap apnā tamāsha tamāsh-gāhoñ meñ

tamāshā-gar kyoñ samajhtā tamāshbīn mujhe

har ek ko maiñ parakhtā thā dil kī āñkhoñ se

bahut qarīb dikhātī thī dūrbīn mujhe

maiñ āstīn meñ palte huoñ ko jāntā huuñ

so dushmanoñ meñ samajh leñ munāfiqīn mujhe

maiñ raat un kī tarah ḳhaak chhāntā rahā huuñ

so dasht-zād samajhte rahe makīn mujhe

maiñ munkashif hī nahīñ ho rahā thā ḳhud un par

baġhaur paḌhte rahe the ka.ī zahīn mujhe

wo husn aankh se dekha hua yaqin mujhe

agarche roz batate the zaerin mujhe

main aap apna tamasha tamash-gahon mein

tamasha-gar kyon samajhta tamashbin mujhe

har ek ko main parakhta tha dil ki aankhon se

bahut qarib dikhati thi durbin mujhe

main aastin mein palte huon ko jaanta hun

so dushmanon mein samajh len munafiqin mujhe

main raat un ki tarah KHak chhanta raha hun

so dasht-zad samajhte rahe makin mujhe

main munkashif hi nahin ho raha tha KHud un par

baghaur paDhte rahe the kai zahin mujhe