wo ek gali rahi din bhar nigah mein meri

vo ik galī rahī din bhar nigāh meñ merī

aur ik hikāyat-e-gul intibāh meñ merī

dil-o-nigāh meñ hairat ke rang bhartā huuñ

ye kā.enāt hai kis ishtibāh meñ merī

ye kyā tazabzub-e-be-intihā hai āñkhoñ meñ

kisī tarah vo khule mujh pe chaah meñ merī

sharāb tez hai ik shaam hai charāġh bhī hai

aur intizār hai husn-e-sipāh meñ merī

maiñ apne ḳhālī dinoñ meñ palaT ke dekhtā huuñ

vo ek yaad salāmat hai raah meñ merī

fasurdagī dam-e-āḳhir mazīd thī lekin

vo ḳhvāb tak to rahā hai panāh meñ merī

ye zaḳhm mere hī nāḳhun se rang rang hue

kisī ko daḳhl nahīñ bārgāh meñ merī

wo ek gali rahi din bhar nigah mein meri

aur ek hikayat-e-gul intibah mein meri

dil-o-nigah mein hairat ke rang bharta hun

ye kaenat hai kis ishtibah mein meri

ye kya tazabzub-e-be-intiha hai aankhon mein

kisi tarah wo khule mujh pe chah mein meri

sharab tez hai ek sham hai charagh bhi hai

aur intizar hai husn-e-sipah mein meri

main apne KHali dinon mein palaT ke dekhta hun

wo ek yaad salamat hai rah mein meri

fasurdagi dam-e-aKHir mazid thi lekin

wo KHwab tak to raha hai panah mein meri

ye zaKHm mere hi naKHun se rang rang hue

kisi ko daKHl nahin bargah mein meri