wo ek shajar jise ajdad ne lagaya tha

vo ik shajar jise ajdād ne lagāyā thā

usī ko kaaT diyā jis kā sar pe saaya thā

vo baat baat meñ phir aaj mujh se ruuTh gayā

baḌe hī pyaar se jis ko manā ke laayā thā

vo ham-navā thā hamārā vo koī ġhair na thā

jo ghar meñ aag hamāre lagāne aaya thā

vahī to aaj hamāre paḌā huā hai gale

baḌe ḳhulūs se jis ko gale lagāyā thā

hamāre sher ko aksar vo paḌhtā rahtā hai

jo be-ḳhudī meñ kabhī ham ne gungunāyā thā

hameñ vo yaad hai ab tak sabaq mohabbat kā

ki harf harf jise aap ne paḌhāyā thā

agar qusūr nahīñ thā koī havāoñ kā

to phir charāg ko kis ne mire bujhāyā thā

vo aaj haath se mere nikal gayā 'shādāñ'

ki jis ko maiñ ne mashaqqat ke ba.ad paayā thā

wo ek shajar jise ajdad ne lagaya tha

usi ko kaT diya jis ka sar pe saya tha

wo baat baat mein phir aaj mujh se ruTh gaya

baDe hi pyar se jis ko mana ke laya tha

wo ham-nawa tha hamara wo koi ghair na tha

jo ghar mein aag hamare lagane aaya tha

wahi to aaj hamare paDa hua hai gale

baDe KHulus se jis ko gale lagaya tha

hamare sher ko aksar wo paDhta rahta hai

jo be-KHudi mein kabhi hum ne gungunaya tha

hamein wo yaad hai ab tak sabaq mohabbat ka

ki harf harf jise aap ne paDhaya tha

agar qusur nahin tha koi hawaon ka

to phir charag ko kis ne mere bujhaya tha

wo aaj hath se mere nikal gaya 'shadan'

ki jis ko main ne mashaqqat ke baad paya tha