wo jaane kis liye bandish lagae baiThe hain

vo jaane kis liye bandish lagā.e baiThe haiñ

hasīn chehre ko mujh se chhupā.e baiThe haiñ

tumhāre hijr ke sadme uThā.e baiThe haiñ

ki zaḳhm siine pe kitne hī khaa.e baiThe haiñ

zamāna samjhegā kyā hāl-e-dil raqīboñ kā

diyoñ ke dard ko donoñ dabā.e baiThe haiñ

huī hai un se jo ulfat batā nahīñ sakte

ye raaz dil se ham apne lagā.e baiThe haiñ

ham un ke ranj-o-alam kā surūr pī pī kar

laboñ pe un ke tabassum sajā.e baiThe haiñ

'ajīb rang 'ajab shoḳhiyāñ 'ajab hai nigāh

faqat 'hasan' hai jo in ko nibhā.e baiThe haiñ

wo jaane kis liye bandish lagae baiThe hain

hasin chehre ko mujh se chhupae baiThe hain

tumhaare hijr ke sadme uThae baiThe hain

ki zaKHm sine pe kitne hi khae baiThe hain

zamana samjhega kya haal-e-dil raqibon ka

diyon ke dard ko donon dabae baiThe hain

hui hai un se jo ulfat bata nahin sakte

ye raaz dil se hum apne lagae baiThe hain

hum un ke ranj-o-alam ka surur pi pi kar

labon pe un ke tabassum sajae baiThe hain

'ajib rang 'ajab shoKHiyan 'ajab hai nigah

faqat 'hasan' hai jo in ko nibhae baiThe hain