wo jab angDai le kar husn ka aalam dikhate hain

vo jab añgḌā.ī le kar husn kā aalam dikhāte haiñ

dil-e-majrūh ke zaḳhmoñ ke Tāñke TuuT jaate haiñ

sar-e-gor-e-ġharībāñ aa ke fitne kyoñ uThāte haiñ

qayāmat hai adam ke sone vāloñ ko jagāte haiñ

sitam to dekhiye kis tarah hamdardī jatāte haiñ

idhar dam toḌtā huuñ maiñ udhar vo muskurāte haiñ

abhī kamsin haiñ rasm-e-ta.aziyat aatī nahīñ un ko

ye kyā kam hai mire phūloñ meñ baiThe muskurāte haiñ

kaleja thaam leñ ab apnā apnā dekhne vaale

qayāmat hai harīm-e-nāz kā parda uThāte haiñ

gharoñ par un ke yā-rab phuul barseñ aag ban ban kar

jo rū tinke hamāre āshiyāne ke jalāte haiñ

kahāñ haiñ ab 'rashīd'-o-'anjum'-o-'jāved' ai 'safdar'

sab is bazm-e-adab se rafta rafta uThte jaate haiñ

wo jab angDai le kar husn ka aalam dikhate hain

dil-e-majruh ke zaKHmon ke Tanke TuT jate hain

sar-e-gor-e-ghariban aa ke fitne kyon uThate hain

qayamat hai adam ke sone walon ko jagate hain

sitam to dekhiye kis tarah hamdardi jatate hain

idhar dam toDta hun main udhar wo muskuraate hain

abhi kamsin hain rasm-e-taziyat aati nahin un ko

ye kya kam hai mere phulon mein baiThe muskuraate hain

kaleja tham len ab apna apna dekhne wale

qayamat hai harim-e-naz ka parda uThate hain

gharon par un ke ya-rab phul barsen aag ban ban kar

jo ru tinke hamare aashiyane ke jalate hain

kahan hain ab 'rashid'-o-'anjum'-o-'jawed' ai 'safdar'

sab is bazm-e-adab se rafta rafta uThte jate hain