wo jis ke dil mein nihan dard do-jahan ka tha

vo jis ke dil meñ nihāñ dard do-jahāñ kā thā

ḳhabar kisī ko nahīñ kaun thā kahāñ kā thā

talāsh-e-yār meñ bhaTkā kiye ḳhalāoñ meñ

hameñ zamīñ kā pata thā na āsmāñ kā thā

hañsā jo phuul to shabnam kī aañkh bhar aa.ī

bahār samjhā jise daur vo ḳhizāñ kā thā

hazār baar marā zindagī meñ jīte-jī

vo shaḳhs ḳhauf jise marg-e-nā-gahāñ kā thā

vahīñ pe jā ke rukī aaj be-ḳhudī apnī

jahāñ pe moḌ mohabbat kī dāstāñ kā thā

bikhertā hī rahā nuur vo shab-e-ġham meñ

jo māhtāb tasavvur ke āsmāñ kā thā

vo jis ne raat dar-e-dil pe aa ke dastak dī

zarūr jhoñkā kisī yād-e-raftagāñ kā thā

tamām umr kī kāvish se tai na ho paayā

vo ek fāsla jo apne darmiyāñ kā thā

huā thā qātil sar-e-ām jab mirā yaaro

ajiib rañg kuchh us vaqt āsmāñ kā thā

wo jis ke dil mein nihan dard do-jahan ka tha

KHabar kisi ko nahin kaun tha kahan ka tha

talash-e-yar mein bhaTka kiye KHalaon mein

hamein zamin ka pata tha na aasman ka tha

hansa jo phul to shabnam ki aankh bhar aai

bahaar samjha jise daur wo KHizan ka tha

hazar bar mara zindagi mein jite-ji

wo shaKHs KHauf jise marg-e-na-gahan ka tha

wahin pe ja ke ruki aaj be-KHudi apni

jahan pe moD mohabbat ki dastan ka tha

bikherta hi raha nur wo shab-e-gham mein

jo mahtab tasawwur ke aasman ka tha

wo jis ne raat dar-e-dil pe aa ke dastak di

zarur jhonka kisi yaad-e-raftagan ka tha

tamam umr ki kawish se tai na ho paya

wo ek fasla jo apne darmiyan ka tha

hua tha qatil sar-e-am jab mera yaro

ajib rang kuchh us waqt aasman ka tha