wo jis ki marzi se aae hain is sadi mein hum

vo jis kī marzī se aa.e haiñ is sadī meñ ham

mileñge us se magar āḳhirī ghaḌī meñ ham

tumhārī yaad mujhe aise DhūñDhtī hai dost

charāġh DhūñDhte haiñ jaise tīrgī meñ ham

sharīf laḌkiyāñ yak-dam se khul nahīñ paatī

so dhīre dhīre se utreñge is nadī meñ ham

vo baat kartā hai aur muskurā ke dekhtā hai

simaT ga.e haiñ faqat itnī sī ḳhushī meñ ham

tumhāre baad bichhaḌne meñ Dar nahīñ lagtā

mufīd kaam kar aa.e the buzdilī meñ ham

ḳhudā ḳhitāb-e-siyāsat se duur rakhnā hameñ

sukūn chāhte haiñ yaar zindagī meñ ham

wo jis ki marzi se aae hain is sadi mein hum

milenge us se magar aaKHiri ghaDi mein hum

tumhaari yaad mujhe aise DhunDhti hai dost

charagh DhunDhte hain jaise tirgi mein hum

sharif laDkiyan yak-dam se khul nahin pati

so dhire dhire se utrenge is nadi mein hum

wo baat karta hai aur muskura ke dekhta hai

simaT gae hain faqat itni si KHushi mein hum

tumhaare baad bichhaDne mein Dar nahin lagta

mufid kaam kar aae the buzdili mein hum

KHuda KHitab-e-siyasat se dur rakhna hamein

sukun chahte hain yar zindagi mein hum