wo jis ki sara jahan puKHtagi se haar gaya

vo jis kī saarā jahāñ puḳhtagī se haar gayā

vo ek koh-e-girāñ aadmī se haar gayā

vahī jo raat pe chhāyā huā añdherā thā

sahar huī hai to vo raushnī se haar gayā

nahīñ hai koī sabab sab se us ke kaTne kā

ġharīb aadmī thā muflisī se haar gayā

har ik mahāz pe dushman ko jis se maat huī

vo apne dostoñ kī dostī se haar gayā

bahut aziiz thī us ko bhī apnī jaan magar

hisār-e-jabr meñ vo bebasī se haar gayā

dar-asl us ke muqaddar meñ haar likkhī thī

vo us se jañg meñ bad-qismatī se haar gayā

hamesha ye hī to hotā rahā hai mere aziiz

kisī kī jiit to koī kisī se haar gayā

nahīñ thā us ke barābar kā ahl-e-zar bhī koī

magar ġharīb kī dariyā-dilī se haar gayā

ye kyā maqām hai insāñ kī zindagī meñ 'nazīr'

nibhā.ī maut se aur zindagī se haar gayā

wo jis ki sara jahan puKHtagi se haar gaya

wo ek koh-e-giran aadmi se haar gaya

wahi jo raat pe chhaya hua andhera tha

sahar hui hai to wo raushni se haar gaya

nahin hai koi sabab sab se us ke kaTne ka

gharib aadmi tha muflisi se haar gaya

har ek mahaz pe dushman ko jis se mat hui

wo apne doston ki dosti se haar gaya

bahut aziz thi us ko bhi apni jaan magar

hisar-e-jabr mein wo bebasi se haar gaya

dar-asl us ke muqaddar mein haar likkhi thi

wo us se jang mein bad-qismati se haar gaya

hamesha ye hi to hota raha hai mere aziz

kisi ki jit to koi kisi se haar gaya

nahin tha us ke barabar ka ahl-e-zar bhi koi

magar gharib ki dariya-dili se haar gaya

ye kya maqam hai insan ki zindagi mein 'nazir'

nibhai maut se aur zindagi se haar gaya