wo jis ne KHud ko haara hai mohabbat mein

vo jis ne ḳhud ko haarā hai mohabbat meñ

vahī insān jiitā hai mohabbat meñ

ghaḌī-bhar kī ḳhushī phir zindagī-bhar dukh

sivā is ke huā kyā hai mohabbat meñ

tire hone se hī maiñ ḳhūb-sūrat huuñ

sunā hai husn khiltā hai mohabbat meñ

shikasta dil shab-e-ġham dard rusvā.ī

are itnā to chaltā hai mohabbat meñ

ye dil jis shaḳhs ko marham samajhtā hai

usī se zaḳhm miltā hai mohabbat meñ

junūnī be-tahāsha be-panah ḳhālis

hamārā ye taqāzā hai mohabbat meñ

mujhe apnī kamī mahsūs hotī hai

ye dil jab se lagāyā hai mohabbat meñ

mire dil meñ faqat us ko ijāzat hai

jise marnā gavāra hai mohabbat meñ

vo nafrat meñ kisī kā bhī nahīñ rahtā

jo ho saktā hamārā hai mohabbat meñ

haqīqat chāhe kuchh bhī ho mohabbat kī

sabhī ne dekhā 'sapnā' hai mohabbat meñ

wo jis ne KHud ko haara hai mohabbat mein

wahi insan jita hai mohabbat mein

ghaDi-bhar ki KHushi phir zindagi-bhar dukh

siwa is ke hua kya hai mohabbat mein

tere hone se hi main KHub-surat hun

suna hai husn khilta hai mohabbat mein

shikasta dil shab-e-gham dard ruswai

are itna to chalta hai mohabbat mein

ye dil jis shaKHs ko marham samajhta hai

usi se zaKHm milta hai mohabbat mein

jununi be-tahasha be-panah KHalis

hamara ye taqaza hai mohabbat mein

mujhe apni kami mahsus hoti hai

ye dil jab se lagaya hai mohabbat mein

mere dil mein faqat us ko ijazat hai

jise marna gawara hai mohabbat mein

wo nafrat mein kisi ka bhi nahin rahta

jo ho sakta hamara hai mohabbat mein

haqiqat chahe kuchh bhi ho mohabbat ki

sabhi ne dekha 'sapna' hai mohabbat mein