wo jo aata tha kabhi pichhle pahar aata nahin

vo jo aatā thā kabhī pichhle pahar aatā nahīñ

ek saaya sā sar-e-dīvār-o-dar aatā nahīñ

āñsuoñ se sīñchte haiñ kisht-e-jāñ ye soch kar

ḳhushk ho jaa.eñ to peḌoñ par samar aatā nahīñ

yuuñ to ghir ghir ke ghaTā.eñ aatī rahtī haiñ magar

jo barasne vaalā bādal hai idhar aatā nahīñ

aur chīzoñ kī tarah ye bhī zamīñ kī den hai

āsmānoñ se utar kar dīda-var aatā nahīñ

kaise andāza lagā letī hai duniyā dekh kar

dard to mahsūs hotā hai nazar aatā nahīñ

sū-e-manzil fāsloñ ko saath le kar chal diye

ham ne jab dekhā ki koī ham-safar aatā nahīñ

ab to yuuñ lagtā hai 'nik.hat' jaane kyoñ har aadmī

apne ghar aatā hai jaise apne ghar aatā nahīñ

wo jo aata tha kabhi pichhle pahar aata nahin

ek saya sa sar-e-diwar-o-dar aata nahin

aansuon se sinchte hain kisht-e-jaan ye soch kar

KHushk ho jaen to peDon par samar aata nahin

yun to ghir ghir ke ghaTaen aati rahti hain magar

jo barasne wala baadal hai idhar aata nahin

aur chizon ki tarah ye bhi zamin ki den hai

aasmanon se utar kar dida-war aata nahin

kaise andaza laga leti hai duniya dekh kar

dard to mahsus hota hai nazar aata nahin

su-e-manzil faslon ko sath le kar chal diye

hum ne jab dekha ki koi ham-safar aata nahin

ab to yun lagta hai 'nikhat' jaane kyon har aadmi

apne ghar aata hai jaise apne ghar aata nahin