wo jo ab tak lams hai us lams ka paikar bane

vo jo ab tak lams hai us lams kā paikar bane

merī ḳhvāhish bhī ajab hai aa.ina patthar bane

ik hisār-e-rañg meñ bas sochtā rahtā huuñ maiñ

kis tarah āñdhī havā kī zad pe koī ghar bane

rāste paañv baneñ to kaise tai hoñ rāste

niiñd kaise aa.egī jab jism hī bistar bane

ḳhūñ-bahā kis se talab ho kis ko qātil māniye

aap apnī soch hī jab zahr kā ḳhanjar bane

qatl ho jab tak na sūraj kā khilegī kaise shaam

rañg hī bikhre na to kaise koī manzar bane

ek muddat sāmnā ḳhud jin ko andhe-pan kā thā

raushnī milte hī ḳhud āñkhoñ ke saudā-gar bane

ḳhūn-e-dil meñ Duub jā.egā to lab par aa.egā

jis ko maiñ likhūñ vahī 'manzūr' harf-e-tar bane

wo jo ab tak lams hai us lams ka paikar bane

meri KHwahish bhi ajab hai aaina patthar bane

ek hisar-e-rang mein bas sochta rahta hun main

kis tarah aandhi hawa ki zad pe koi ghar bane

raste panw banen to kaise tai hon raste

nind kaise aaegi jab jism hi bistar bane

KHun-baha kis se talab ho kis ko qatil maniye

aap apni soch hi jab zahr ka KHanjar bane

qatl ho jab tak na suraj ka khilegi kaise sham

rang hi bikhre na to kaise koi manzar bane

ek muddat samna KHud jin ko andhe-pan ka tha

raushni milte hi KHud aankhon ke sauda-gar bane

KHun-e-dil mein Dub jaega to lab par aaega

jis ko main likhun wahi 'manzur' harf-e-tar bane