wo jo dariya ko kisi roz nazar aate the

vo jo dariyā ko kisī roz nazar aate the

mauj tham jaatī thī paanī meñ bhañvar aate the

shāḳh-dar-shāḳh jahāñ hijr khulā rahtā thā

zaḳhm-dar-zaḳhm usī rah meñ shajar aate the

ruup bahrūp meñ Dhalte hue din-bhar saa.e

sahn-e-tanhā.ī meñ har shaam utar aate the

koī manzil sar-e-manzil se bichhaḌ jaatī thī

fāsle roz na.e le ke safar aate the

kaun idrāk kī sarhad se guzarne vaale

haañ vahī jo ki ba-andāz-e-digar aate the

lams-e-jāñ-baḳhsh kā e.ajāz nahīñ to kyā thā

phuul khilte the daraḳhtoñ pe samar aate the

kitne inkār ma.ayyat meñ rahā karte the

haañ mirī samt vo 'iqrār' agar aate the

wo jo dariya ko kisi roz nazar aate the

mauj tham jati thi pani mein bhanwar aate the

shaKH-dar-shaKH jahan hijr khula rahta tha

zaKHm-dar-zaKHm usi rah mein shajar aate the

rup bahrup mein Dhalte hue din-bhar sae

sahn-e-tanhai mein har sham utar aate the

koi manzil sar-e-manzil se bichhaD jati thi

fasle roz nae le ke safar aate the

kaun idrak ki sarhad se guzarne wale

han wahi jo ki ba-andaz-e-digar aate the

lams-e-jaan-baKHsh ka eajaz nahin to kya tha

phul khilte the daraKHton pe samar aate the

kitne inkar mayyat mein raha karte the

han meri samt wo 'iqrar' agar aate the