wo jo ek ilzam tha us par kahin

vo jo ik ilzām thā us par kahīñ

aa na jaa.e ab hamāre sar kahīñ

jis kī ḳhātir qāfila rokā gayā

vo musāfir chal diyā uTh kar kahīñ

jab vo do panchhī mile the khet meñ

phir nazar aa jaa.e vo manzar kahīñ

ḳhvāhishoñ ke ġhaar kā muñh band hai

tum haTā denā na vo patthar kahīñ

āsmāñ se aane vaale saat rañg

the kisī ke, aa ke utre, par kahīñ

dil kī ik ummīd dil meñ rah ga.ī

ik diyā sā bujh gayā jal kar kahīñ

lāpata hai ik samundar aaj tak

jhāñk baiThā thā mire andar kahīñ

Das na le mujh ko kahīñ ḳhushbū tirī

khā na jaa.e mujh ko ye bistar kahīñ

aa gayā vo jism ke malbe tale

maiñ girā dahlīz se bāhar kahīñ

dhuup ke lambe safar ke ba.ad ham

saañs leñge saa.e meñ ruk kar kahīñ

wo jo ek ilzam tha us par kahin

aa na jae ab hamare sar kahin

jis ki KHatir qafila roka gaya

wo musafir chal diya uTh kar kahin

jab wo do panchhi mile the khet mein

phir nazar aa jae wo manzar kahin

KHwahishon ke ghaar ka munh band hai

tum haTa dena na wo patthar kahin

aasman se aane wale sat rang

the kisi ke, aa ke utre, par kahin

dil ki ek ummid dil mein rah gai

ek diya sa bujh gaya jal kar kahin

lapata hai ek samundar aaj tak

jhank baiTha tha mere andar kahin

Das na le mujh ko kahin KHushbu teri

kha na jae mujh ko ye bistar kahin

aa gaya wo jism ke malbe tale

main gira dahliz se bahar kahin

dhup ke lambe safar ke baad hum

sans lenge sae mein ruk kar kahin