wo jo ek shakl mere chaar taraf bikhri thi

vo jo ik shakl mire chaar taraf bikhrī thī

maiñ ne jab ġhaur se dekhā to mirī apnī thī

phir asīroñ pe kisī ḳhvāb ne jaadū Daalā

raat kuchh halqa-e-zanjīr meñ ḳhāmoshī thī

yuuñ to ādāb-e-mohabbat meñ sabhī jaa.ez thā

phir bhī chup rahne meñ ik shaan dil-āvezī thī

raat bhar jāgne vāloñ ne pas-e-sham.a-e-zard

sub.h ik ḳhvāb kī sūrat kī tarah dekhī thī

shorish-e-sher meñ ḳhāmosh sī kyuuñ hai 'zehrā'

achchhā-ḳhāsā to kabhī vo bhī kahā kartī thī

wo jo ek shakl mere chaar taraf bikhri thi

main ne jab ghaur se dekha to meri apni thi

phir asiron pe kisi KHwab ne jadu Dala

raat kuchh halqa-e-zanjir mein KHamoshi thi

yun to aadab-e-mohabbat mein sabhi jaez tha

phir bhi chup rahne mein ek shan dil-awezi thi

raat bhar jagne walon ne pas-e-shama-e-zard

subh ek KHwab ki surat ki tarah dekhi thi

shorish-e-sher mein KHamosh si kyun hai 'zehra'

achchha-KHasa to kabhi wo bhi kaha karti thi