wo jo mujhko sulata raha der tak

vo jo mujh ko sulātā rahā der tak

mere sapne churātā rahā der tak

bhuul jā.ūñgā kyā is tarah maiñ use

mujh ko likh likh miTātā rahā der tak

log shams-o-qamar le ke chalte bane

maiñ sitāre banātā rahā der tak

ban sañvar ke yūñhī muskurāte hue

aa.ine ko jalātā rahā der tak

ḳhud se laḌtā rahā maiñ usī kī tarah

phir maiñ ḳhud ko manātā rahā der tak

us ne jab jab judā.ī kī bāteñ kahīñ

maiñ bahāne banātā rahā der tak

jaane kyā baat thī vaqt-e-ruḳhsat ki vo

haath mujh se chhuḌātā rahā der tak

maiñ ne dhaḌkan ko apnī sañbhāle rakhā

vo bhī aañsū chhupātā rahā der tak

saare ilzām apne hī sar le liye

maiñ ta'alluq bachātā rahā der tak

wo jo mujh ko sulata raha der tak

mere sapne churaata raha der tak

bhul jaunga kya is tarah main use

mujh ko likh likh miTata raha der tak

log shams-o-qamar le ke chalte bane

main sitare banata raha der tak

ban sanwar ke yunhi muskuraate hue

aaine ko jalata raha der tak

KHud se laDta raha main usi ki tarah

phir main KHud ko manata raha der tak

us ne jab jab judai ki baaten kahin

main bahane banata raha der tak

jaane kya baat thi waqt-e-ruKHsat ki wo

hath mujh se chhuData raha der tak

main ne dhaDkan ko apni sanbhaale rakha

wo bhi aansu chhupata raha der tak

sare ilzam apne hi sar le liye

main ta'alluq bachata raha der tak