wo jo tumne gham diya tha mujhe sazgar hota

vo jo tum ne ġham diyā thā mujhe sāzgār hotā

agar itnā aur hotā ki vo ustuvār hotā

tirī be-ruḳhī ke sadqe mujhe aa gayā hai jiinā

na to rūThtā na zālim mujhe ġham se pyaar hotā

shab-o-roz ke nazāre ye karishme rañg-o-bū ke

ye tilism toḌ detā agar iḳhtiyār hotā

use vaqf-e-ḳhāk kar ke kiyā ḳhuub tū ne varna

ye vo zarra thā ki uThtā to falak pe baar hotā

kabhī ek baar bhī to mirā tazkira chaman meñ

ba-zabān-e-gul na hotā ba-zabān-e-ḳhār hotā

lo suno ki ab zamāna tumheñ kah rahā hai kyā kuchh

yahī maiñ jo arz kartā tumheñ nāgavār hotā

mire pās-e-zabt-e-ġham ko na huā pasand varna

na mujhe qarār hotā na tumheñ qarār hotā

are 'nūr' kaun suntā tirā uzr-e-be-gunāhī

tū gunāh bhī na kartā to gunāhgār hotā

wo jo tum ne gham diya tha mujhe sazgar hota

agar itna aur hota ki wo ustuwar hota

teri be-ruKHi ke sadqe mujhe aa gaya hai jina

na to ruThta na zalim mujhe gham se pyar hota

shab-o-roz ke nazare ye karishme rang-o-bu ke

ye tilism toD deta agar iKHtiyar hota

use waqf-e-KHak kar ke kiya KHub tu ne warna

ye wo zarra tha ki uThta to falak pe bar hota

kabhi ek bar bhi to mera tazkira chaman mein

ba-zaban-e-gul na hota ba-zaban-e-KHar hota

lo suno ki ab zamana tumhein kah raha hai kya kuchh

yahi main jo arz karta tumhein nagawar hota

mere pas-e-zabt-e-gham ko na hua pasand warna

na mujhe qarar hota na tumhein qarar hota

are 'nur' kaun sunta tera uzr-e-be-gunahi

tu gunah bhi na karta to gunahgar hota