wo jo umr bhar mein kahi gai sar-e-sham-e-hijr likhi gai

vo jo umr bhar meñ kahī ga.ī sar-e-shām-e-hijr likhī ga.ī

vahī dāstān-e-vafā mirī mare hoñT kis liye sī ga.ī

hue qaid jurm-e-vafā pe bhī ki hisār-e-zulm nasīb thā

mirī fard-e-jurm ajiib hai jo mire lahū se likhī ga.ī

ye shu.ūr-e-zīst hai nāseho nahīñ kaam deñgī nasīhateñ

mire shahr-e-ishq tirī binā mirī zaat se hī rakhī ga.ī

na.e naam manzar-e-auj par haiñ na.e hī qisse nisāb meñ

jo shahādatoñ kī thī dāstāñ vahī hāshiye pe rakhī ga.ī

jo paḌhā thā dars-e-nisāb meñ vo nazar na aayā tamām umr

na.e tajrabāt-e-jahāñ liye sar-e-hashr bhī be-kasī ga.ī

kahīñ mil na paa.e vo dām-e-fan the jo zehn-o-dil meñ liye hue

vo amīr-e-shahr vo shahr-e-zar kī vo vahāñ bhī to bebasī ga.ī

vo murād-e-ḳhās jo umr bhar rahī jān-o-dil se azīz-tar

hue ham kabhī jo qarīb-tar to jhijhak hī hoñToñ ko sī ga.ī

na to ḳhvāhisheñ kabhī kam huiiñ na hī aas TuuTī kabhī mirī

thā ajiib rishta yaqīn se mire saath hī muflisī ga.ī

wo jo umr bhar mein kahi gai sar-e-sham-e-hijr likhi gai

wahi dastan-e-wafa meri mare honT kis liye si gai

hue qaid jurm-e-wafa pe bhi ki hisar-e-zulm nasib tha

meri fard-e-jurm ajib hai jo mere lahu se likhi gai

ye shuur-e-zist hai naseho nahin kaam dengi nasihaten

mere shahr-e-ishq teri bina meri zat se hi rakhi gai

nae nam manzar-e-auj par hain nae hi qisse nisab mein

jo shahadaton ki thi dastan wahi hashiye pe rakhi gai

jo paDha tha dars-e-nisab mein wo nazar na aaya tamam umr

nae tajrabaat-e-jahan liye sar-e-hashr bhi be-kasi gai

kahin mil na pae wo dam-e-fan the jo zehn-o-dil mein liye hue

wo amir-e-shahr wo shahr-e-zar ki wo wahan bhi to bebasi gai

wo murad-e-KHas jo umr bhar rahi jaan-o-dil se aziz-tar

hue hum kabhi jo qarib-tar to jhijhak hi honTon ko si gai

na to KHwahishen kabhi kam huin na hi aas TuTi kabhi meri

tha ajib rishta yaqin se mere sath hi muflisi gai