wo karwan-e-bahaaran ki be-dara hoga

vo kārvān-e-bahārāñ ki be-darā hogā

sukūt-e-ġhunche kī manzil pe ruk gayā hogā

bajā ki dil nahīñ zindān-e-be-ḳhudī kā asiir

magar ye qaid-e-anā se kahāñ rahā hogā

shuā-e-mahr kī nazzārgī ke shauq meñ chāñd

falak ke dīda-e-be-ḳhvāb meñ Dhalā hogā

kuchh aisī sahl nahīñ fan kī munfarid taḳhlīq

ḳhudā bhī merī tarah pahroñ sochtā hogā

maiñ tere zehan meñ rach bas gayā huuñ misl-e-ḳhayāl

jidhar bhī jā.egā tū merā sāmnā hogā

bahā ke le bhī gayā merī har matā-e-sukūñ

jo ashk abhī tire ruḳh par nahīñ bahā hogā

ye aarzū hai ki vo din na dekhnā ho nasīb

mire amal se mirā fikr jab ḳhafā hogā

khilā rahā hai jo harf-o-navā ke lāla-o-gul

vo merā nutq nahīñ mauja-e-sabā hogā

wo karwan-e-bahaaran ki be-dara hoga

sukut-e-ghunche ki manzil pe ruk gaya hoga

baja ki dil nahin zindan-e-be-KHudi ka asir

magar ye qaid-e-ana se kahan raha hoga

shua-e-mahr ki nazzargi ke shauq mein chand

falak ke dida-e-be-KHwab mein Dhala hoga

kuchh aisi sahl nahin fan ki munfarid taKHliq

KHuda bhi meri tarah pahron sochta hoga

main tere zehan mein rach bas gaya hun misl-e-KHayal

jidhar bhi jaega tu mera samna hoga

baha ke le bhi gaya meri har mata-e-sukun

jo ashk abhi tere ruKH par nahin baha hoga

ye aarzu hai ki wo din na dekhna ho nasib

mere amal se mera fikr jab KHafa hoga

khila raha hai jo harf-o-nawa ke lala-o-gul

wo mera nutq nahin mauja-e-saba hoga