wo kash fikr ko itni uDan de deta

vo kaash fikr ko itnī uḌaan de detā

maiñ apne 'aks ke muñh meñ zabān de detā

agar shu'ūr kī dastak pe kaan de detā

to dasht-e-fikr ke murdoñ meñ jaan de detā

tirī jagah pe agar sang ko rakhā hotā

to dast-e-dil pe yaqīnan azaan de detā

ġhunūdgī mirā jiinā harām kar detī

sukūt-e-shab meñ jo aahaT pe dhyān de detā

fasīl-e-chashm pe har shab diyā na jal paatā

maiñ us ko ġham kā agar ye makān de detā

mujhe har ek sabaq karbalā se mil jaatā

maiñ tishnagī kā agar imtihān de detā

tumhāre 'ishq kā kalma jo paḌh liyā hotā

to dasht-e-hijr meñ jā kar azaan de detā

zamīn phir mujhe hairat se dekhtī 'shārib'

maiñ us ke sar pe agar āsmān de detā

wo kash fikr ko itni uDan de deta

main apne 'aks ke munh mein zaban de deta

agar shu'ur ki dastak pe kan de deta

to dasht-e-fikr ke murdon mein jaan de deta

teri jagah pe agar sang ko rakha hota

to dast-e-dil pe yaqinan azan de deta

ghunudgi mera jina haram kar deti

sukut-e-shab mein jo aahaT pe dhyan de deta

fasil-e-chashm pe har shab diya na jal pata

main us ko gham ka agar ye makan de deta

mujhe har ek sabaq karbala se mil jata

main tishnagi ka agar imtihan de deta

tumhaare 'ishq ka kalma jo paDh liya hota

to dasht-e-hijr mein ja kar azan de deta

zamin phir mujhe hairat se dekhti 'shaarib'

main us ke sar pe agar aasman de deta