wo kabhi shaKH-e-gul-e-tar ki tarah lagta hai

vo kabhī shāḳh-e-gul-e-tar kī tarah lagtā hai

aur kabhī dashna-o-ḳhanjar kī tarah lagtā hai

le ke aayā huuñ maiñ kuchh ḳhvāb un āñkhoñ ke liye

aa.ina bhī jinheñ patthar kī tarah lagtā hai

hādse aise bhī guzre ki tasavvur jin kā

dil ko chhū jaa.e to Thokar kī tarah lagtā hai

halchaleñ dā.era-e-jāñ meñ chhupī rahtī haiñ

jis se miliye vo samundar kī tarah lagtā hai

kaisā mausam hai ki chubhtī haiñ badan meñ kirneñ

sar pe sūraj kisī ḳhanjar kī tarah lagtā hai

aadmī shiddat-e-ehsās kā maarā ho agar

barg-e-gul bhī use patthar kī tarah lagtā hai

dasht-e-be-āb meñ jalte hue hoñToñ ko 'bashīr'

ek qatra bhī samundar kī tarah lagtā hai

wo kabhi shaKH-e-gul-e-tar ki tarah lagta hai

aur kabhi dashna-o-KHanjar ki tarah lagta hai

le ke aaya hun main kuchh KHwab un aankhon ke liye

aaina bhi jinhen patthar ki tarah lagta hai

hadse aise bhi guzre ki tasawwur jin ka

dil ko chhu jae to Thokar ki tarah lagta hai

halchalen daera-e-jaan mein chhupi rahti hain

jis se miliye wo samundar ki tarah lagta hai

kaisa mausam hai ki chubhti hain badan mein kirnen

sar pe suraj kisi KHanjar ki tarah lagta hai

aadmi shiddat-e-ehsas ka mara ho agar

barg-e-gul bhi use patthar ki tarah lagta hai

dasht-e-be-ab mein jalte hue honTon ko 'bashir'

ek qatra bhi samundar ki tarah lagta hai