wo kahte hain ba-asani na hasrat dil se niklegi

vo kahte haiñ bā-āsānī na hasrat dil se niklegī

jo niklegī to ai 'sābir' baḌī mushkil se niklegī

mohabbat aap kī hargiz na mere dil se niklegī

qayāmat meñ bhī ye lailā na is mahmil se niklegī

chalo achchhā hai rahne do yūñhī armāñ bharā mujh ko

na tum ghar mere aaoge na hasrat dil se niklegī

yahīñ ham ḳhaak ho jā.eñge jal kar misl-e-parvāna

hamārī laash bhī zālim na is mahfil se niklegī

faqīroñ kī duā lo husn kī ḳhairāt do bose

vahī maqbūl hogī jo lab-e-sā.il se niklegī

na vaqt-e-naz.a bhī aaya ayādat ko tū ai zālim

hamārī jaañ to niklegī magar mushkil se niklegī

raheñ āvāra-e-sahrā nahīñ ham tujh se dīvāne

hamārī laash majnūñ kūcha-e-qātil se niklegī

na kū-e-yār se ai qais tujh ko vāpas aanā thā

tamanna ḳhaak terī sa.i-e-lā-hāsil se niklegī

sarā-e-dahr meñ ham is liye Thahre haiñ dam bhar ko

ki rāh-e-ḳhāna-e-dil-dār usī mahfil se niklegī

hameñ muñh pher kar tū zab.h kartā hai to kar lekin

hamārī jaan ai qātil baḌī mushkil se niklegī

nahīñ is tarah meñ kahnā ġhazal āsān ai 'sābir'

girah jo paḌ ga.ī ranjish kī vo mushkil se niklegī

wo kahte hain ba-asani na hasrat dil se niklegi

jo niklegi to ai 'sabir' baDi mushkil se niklegi

mohabbat aap ki hargiz na mere dil se niklegi

qayamat mein bhi ye laila na is mahmil se niklegi

chalo achchha hai rahne do yunhi arman bhara mujh ko

na tum ghar mere aaoge na hasrat dil se niklegi

yahin hum KHak ho jaenge jal kar misl-e-parwana

hamari lash bhi zalim na is mahfil se niklegi

faqiron ki dua lo husn ki KHairaat do bose

wahi maqbul hogi jo lab-e-sail se niklegi

na waqt-e-naza bhi aaya ayaadat ko tu ai zalim

hamari jaan to niklegi magar mushkil se niklegi

rahen aawara-e-sahra nahin hum tujh se diwane

hamari lash majnun kucha-e-qatil se niklegi

na ku-e-yar se ai qais tujh ko wapas aana tha

tamanna KHak teri sai-e-la-hasil se niklegi

sara-e-dahr mein hum is liye Thahre hain dam bhar ko

ki rah-e-KHana-e-dil-dar usi mahfil se niklegi

hamein munh pher kar tu zabh karta hai to kar lekin

hamari jaan ai qatil baDi mushkil se niklegi

nahin is tarah mein kahna ghazal aasan ai 'sabir'

girah jo paD gai ranjish ki wo mushkil se niklegi