wo kaun hai jis ki wahshat par sunte hain ki jangal rota hai

vo kaun hai jis kī vahshat par sunte haiñ ki jañgal rotā hai

vīrāne meñ aksar raat ga.e ik shaḳhs hai pāgal rotā hai

phir san se kahīñ purvā.ī chalī khilte nahīñ dekhī dil kī kalī

ye jhuuT hai barkhā hotī hai ye sach hai ki bādal rotā hai

hai us kā sarāpā dīda-e-tar duniyā ko magar kyā is kī ḳhabar

sab ke liye āñkheñ hañstī haiñ mere liye kājal rotā hai

vo kis ke liye siñghār kare chandan sā badan yuuñ ruup bhare

jab maañg jhkā-jhak hotī hai ā.īna jhalā-jhal rotā hai

bantī nahīñ dil se 'shāz' apnī ye dost hai yā dushman koī

ham haiñ ki musalsal hañste haiñ vo hai ki musalsal rotā hai

wo kaun hai jis ki wahshat par sunte hain ki jangal rota hai

virane mein aksar raat gae ek shaKHs hai pagal rota hai

phir san se kahin purwai chali khilte nahin dekhi dil ki kali

ye jhuT hai barkha hoti hai ye sach hai ki baadal rota hai

hai us ka sarapa dida-e-tar duniya ko magar kya is ki KHabar

sab ke liye aankhen hansti hain mere liye kajal rota hai

wo kis ke liye singhaar kare chandan sa badan yun rup bhare

jab mang jhka-jhak hoti hai aaina jhala-jhal rota hai

banti nahin dil se 'shaz' apni ye dost hai ya dushman koi

hum hain ki musalsal hanste hain wo hai ki musalsal rota hai