wo kaun log hain jo mai udhaar lete hain

vo kaun log haiñ jo mai udhār lete haiñ

ye mai-farosh to Topī utaar lete haiñ

ye paas parda-nashīnoñ kā hai ki naale bhī

jo ūñche hote haiñ parde pukār lete haiñ

vo kahte haiñ abhī allāh itnī tāqat hai

jo karvaTeñ kabhī ham be-qarār lete haiñ

bachā.eñge gul-o-bulbul ko dām-e-gulchīñ se

jo koī pahuñche to fasl-e-bahār lete haiñ

yahī haiñ kaam nikaltā hai jin kā be-tā.at

maze karam ke tire sharmsār lete haiñ

utarte arsh se Dartā hai tū duā vaale

asar ko haath baḌhā kar utaar lete haiñ

sharāb ke liye mai-nosh muñh haiñ phailā.e

jam.hā.īyāñ nahīñ vaqt-e-ḳhumār lete haiñ

gunāhgār haiñ itne hī un butoñ ke ham

ki pāñch vaqt ḳhudā ko pukār lete haiñ

jamā ye rañg ki ab vaqt-e-zamzama-sanjī

chaman meñ mujh ko anādil pukār lete haiñ

piye hoñ kitnī hī lekin ye hosh rahtā hai

ki sote vaqt vo zevar utaar lete haiñ

'riyāz' bātoñ meñ apnī agar nahīñ jaadū

parī ko shīshe meñ yūñhī utaar lete haiñ

wo kaun log hain jo mai udhaar lete hain

ye mai-farosh to Topi utar lete hain

ye pas parda-nashinon ka hai ki nale bhi

jo unche hote hain parde pukar lete hain

wo kahte hain abhi allah itni taqat hai

jo karwaTen kabhi hum be-qarar lete hain

bachaenge gul-o-bulbul ko dam-e-gulchin se

jo koi pahunche to fasl-e-bahaar lete hain

yahi hain kaam nikalta hai jin ka be-taat

maze karam ke tere sharmsar lete hain

utarte arsh se Darta hai tu dua wale

asar ko hath baDha kar utar lete hain

sharab ke liye mai-nosh munh hain phailae

jamhaiyan nahin waqt-e-KHumar lete hain

gunahgar hain itne hi un buton ke hum

ki panch waqt KHuda ko pukar lete hain

jama ye rang ki ab waqt-e-zamzama-sanji

chaman mein mujh ko anadil pukar lete hain

piye hon kitni hi lekin ye hosh rahta hai

ki sote waqt wo zewar utar lete hain

'riyaz' baaton mein apni agar nahin jadu

pari ko shishe mein yunhi utar lete hain